يَ حْبابْ غابِ ٱلْعُمُرْ يَ حْبابْ ـ شعر : محمود مرعي

**محمود مرعي** الأربعاء يناير 27, 2010 11:53 pm

وَرْداتِ جوري مْزَهِّرهْ عَ عْتابْنا = صَرْلَا عُمُرْ تُنْشُرْ أَريجِ تْرابْنا
نيسانْ كُلْ ما زارْ يُقْطُفْ وَرِدِْتِينْ = وَرْدِهْ إِلو وْوَرْدِهْ إِلـى غُيَّابْنا
***
يَ حْبابْ غابِ ٱلْعُمُرْْ يَ حْبابْ = وِالرَّاسِ فارَقْ سَوادُو وْشابْ
وِبْلَادْ تِبْكي أَسى مِنْ يُومْ = فُرْقِةْ أَهِلْها وْأَعَزِّ حْبابْ
***
غابِ الرَّبيعِ لْكانِ يِطْلَعْ ﺑِﭑلْفَلا = يِسْهرْ مَعِ ٱلْعَنْزاتِ بِشْهورِ ٱلْكَلا
وِغْنامِ كانوا عَ الرُّبى يِتْعَمْشَقوا = عَ ٱنْغامْ يِعْزِفْها ٱلْـحَجَلْ كُلَّا حَلا
***
بَعْدُو النَّبِعْ عا شَفَى الرُّبْعانْ = يِنْعَفْ دُموعو عَلى ٱلْوِدْيانْ
عَ فْراقِ رَبْعو لْسَفَرْهُنْ طالْ = وِيْـحِنْ كُلْمـا ٱلْتَقى الرِّعْيانْ
***
بَعْدا بْتِجي عَالدَّارِ أَسْرابِ ٱلْـحَمـامْ = وَرْداتِ حُوضِ الدَّارِ جافاها ٱلْـمَنامْ
وِالتِّينِ وَالزَّيْتونِ مَعْ رُمَّانْها = وِالصَّبِرْ طَعْمو مُرّْ .. يِهْديكو السَّلامْ
***
يَ حْبابْنا لْـهاجَروا لَبْعيدْ = اَللهْ مَعُنْ يا هَوى لَـ تْقيدْ
بُكْرَهْ بِعودو يَ بَيْتِ ٱلْـجودْ = يِضْحَكْ وَطَنَّا وْ يهِلِّ ٱلْعيدْ

**فاتن دراوشة** الإثنين فبراير 01, 2010 2:19 pm

ما غابْ روح الأهلْ

لِسّا صَداهُنْ حَيْ

بَعدو الصّبي اللي كانْ

يلعَبْ بجنب الفَيْ

وبعدُن صبايا كْتارْ

يِملو حَشا الفَخّارْ

منْ نَبْعِنا بالمَيْ

ما غابْ منْ هالبالْ

ولا تزحزَحِ المَوّالْ

كلْ شي عَحالو ظَلْ

يُنطُرْ لهالغيّابْ

مهما سَفَرهُمْ طالْ

رَحْ يِرجَعو الأحبابْ

وْرَحْ ترجَعْ الضحكاتْ

تِملا ضَواحي الحَيْ

يَ حْبابْ غابِ ٱلْعُمُرْ يَ حْبابْ ـ شعر : محمود مرعي

يَ حْبابْ غابِ ٱلْعُمُرْ يَ حْبابْ ـ شعر : محمود مرعي

رد: يَ حْبابْ غابِ ٱلْعُمُرْ يَ حْبابْ ـ شعر : محمود مرعي